Bi arkitektoek Donostiako AGETn ikasi dute eta hamarkada batez Euskal Herriko arkitekturako estudio handietan lanean aritu dira. Estudio horietan Carlos Ferrater arkitektoarekin edo himmelb(l)au kooperatibarekin lankidetzan aritzeko aukera izan dute. 2009an, Behark plataforma sortu zuten Beñat Saratxaga eta Gentzane Goikuriak arkitektura isila garatzeko asmoarekin. Arkitektura horren xedea da azterketatik eta behaketatik abiatuta, proiektu bakoitzaren helburuak ahalik eta modurik efizienteenean eta egokienean betetzea, lortzeko behar-beharrezkoa dena soilik proposatuz.

Sustatzaile publiko zein pribatuentzako egindako eraikuntza berriko proiektu ugarien artean, saritutako hauek nabarmentzen dira: Gorbeialdeko abeltzainen eta albaitarien familia batentzako baserria (2014ko Egurtek saria), Aiaraldea Ekintzen Faktoria zentro sozio-kulturaleko nabe bat eraldatzea (COAVN 2022 saria) eta Larrabetzuko Last Chance for a Slow Dance estalitako espazio publikoa (COAVN 2022 saria, Egurtek 2022 saria, AITIM 2022 saria, Arkitektura eta Hirigintzako Iberoamerikako XII. Bi urtekoaren CSCAEren 2021eko ARKITEKTURA sarietako finalista eta Arkitektura Ondarearen Esku Hartzerako Europako AHI sariaren finalista, besteak beste). Behark estudioaren lanaren bereizgarriak dira eraikita dagoenaren eraldatzea, birgaitzea eta hiri-berroneratzea, batez ere narriatutako auzoetan edo egungo estandarretara egokitutako eraikinak edo azpiegiturak ez dituzten auzoetan, eta herritarren parte-hartzea sustatzen du espazio publikoaren diseinuan (eta gozamenean). Alde horretatik, nabarmentzekoa da hiriko hainbat auzo Birgaitzeko Lehentasuna duten Auzoak izendatzeko Bilboko Birgaitze Urbanistikorako Sozietatearentzat egindako azterketa teknikoetan eskuratutako esperientzia. Azterketa horien barruan 350 etxebizitza-eraikin ingururen azterketa teknikoa egin zuen. Azterketa horiek egiten lortutako esperientziari esker, Beharkek etxebizitza-eraikinak eraldatzeko eta birgaitzeko hainbat esku-hartze berezi egin ditu azkenaldian, besteak beste, Olabeaga Aldapako 14. zenbakiko eraikinean egindakoa eta Olabeagako Dike 2A Berria eraikinaren eraldaketa. 2019ko COAVN arkitektura-sarietan finalista izan da eraikin hori.

Eraikitakoa eraldatzeko estrategiak sustatzeko, Beharkek hainbat sistema sortu ditu, esaterako Parkez. Espaloiak zabaltzeko eta hiri-berroneratzea egiteko sistema modularra da. Baita HABIT[ar] ere, estandarrari aurka egiteko aukera ematen duen etxebizitza-eraikinak eraldatzeko sistema.

Estudioaren lana leku askotan argitaratu da eta egon da erakusgai, eta bazkideak irakasle izan dira UPV/EHU eta UEUko Etxebizitza Publikoaren Masterrean.