Altzairuaren fabrikazioari lotutako prozesuen jarraipena denbora errealean egitea desafio handia da prozesuaren parametroen eta gertaera estokastikoen interakzio fisiko eta kimiko batzuk direla eta. Egoera edo gertaera horiek ulertzea konplexua denez, horrek jarraipena egiteko tresna arruntak erabiltzea mugatzen du. Azken urteotan, altzairu garbiaren mundu mailako eskaria gero eta handiagoa izan da eta horrek prozesuen predikziozko kontrola eta jarraipena egiteko metodo berritzaileak aurkitzeko beharra sortu du.

Adimen artifizial aplikatua erabiliz, datuetan oinarritutako eredu dinamikoak gara daitezke produkzio arloko akatsak gutxituz prozesamendu sendoa lortzen laguntzeko. Altzairuaren fabrikazioan irregulartasunak bizkor detektatzearen abantaila kontuan hartuta, gero eta handiagoa da datuetan oinarritutako ereduen erabilera. Datuetan oinarritutako prozesuen erabilerak dituen aplikazioetako bat da altzairuen galdaketa jarraituari lotutako buxadura-fenomenoa modu goiztiarrean detektatzea. Altzairuaren galdaketa jarraituan hondoratutako sarrera-pita buxatuta geratzea da gertaera estokastiko esanguratsu bat eta beharrezkoa da horren inguruko jarraipena egitea galdagarritasunaren ikuspegitik. Beste aplikazio garrantzitsu bat da zalia fintzeko lanetan material-gehikuntzen onlineko optimizazioa egitea. Altzairu gradu bakoitza ezberdina denez, erabat gaituta dagoen ikasketa automatikoko (ML) eredua garatzea erronka bihurtu da erabilgarri dauden produkzio-zerbitzarietan ezartzeko. Horretarako, datu industrialak bildu ziren altzairu-lantegietatik ereduaren arauak diseinatu eta balioztatu ahal izateko. Jasotako datu horiek, gero, aztertu egin ziren altzairua produzitzeko hainbat etapatan inklusio ez-metalikoen ebaluazioaren etengabeko jarraipena eginez ereduaren parametroak optimizatzeko. Aurrez ikusitako galdagarritasunaren eta benetako galdagarritasunaren arteko aldeak aztertu ziren garatu berriak ziren ereduak egiaztatu eta balioztatzeko. Ahalegin bereziak egin zituzten datuak desbideratuz gero ereduak moldagarriak izan zitezen, hala ereduaren errendimenduaren degradazioa ekiditeko. Ereduaren predikziozko emaitza horiek eta kalkulu termodinamiko eraginkorrak erabakiak hartzeko prozesuan laguntza gisa erabil daitezke prozesuaren jarraipen eraginkorra egiteko garaian.